نحكيلكم أسراري وتجربتي الأولى مع الجلباب.. قصة مشوقة

ارواحي غسلي معايا الكسوة تعمرت لحالة عندي… آني جاية ماما صبري… وين رايحة تجري نتي… نعاون ماما ونولي..

سلام.. اسمي أنفال.. نبداو حكايتي.. في عمري 8 سنين، نقرا فالابتدائي، نية كيما كامل لبنات، زيني كأي بنت جزائرية، العين الكحلة والحاجب وبشرة بيضاء.. عايشة مع عايلة عادية، عندي جدي، الجدة ميتة ربي يرحمها، ساكنين في دار عرب..

نقرا ونولي، قفلت عشر سنين، واحد المرة جاو عندنا ضياف، مرا وعجوزتها ووليدهم، انا قعدت باهتة فالزين تع هاذيك لمرا عندها عينيها كباار وزرقين كي لبحر وبيضة البشرة، لابسة جلباب، عندها يدين مرايا بيض ويشعلو.. هوما دخلو وانا قعدت نشوف فيها، دخلت لقلبي..

عيطتلي ماما سلمت عليهم وعلى هذيك لمرا، تبسمت معايا، قعدت في بلاصة، ونشوف في جلبابها، وكيفاه مستورة، قصرو شوية وراحو..

دارت عندي هاذيك لمرا ومستني في وجهي وضحكت وقاتلي: “حافضيلي على روحك”، وراحت..

رحت عند ماما قتلها شكون هاذوا: “هاذيك لمرا تكون بنت خال بوك وشايبة”، اي عجوزتها..

رحت لبيتي وصورة المرا في وجهي وقلبي وعقلي، آية في الجمال، ما شاء الله، وخاصة الجلباب، دخل قلبي ضربة وحدة..

وصل بابا حطتلو ماما يتغدا… آي جات آلاء …اا وكتاه.. ليوم صباح.. ايوه وش يحكو كش جديد علا خالي..والله والو كيما موالف، مسكين قاتلك راه من سبيطار لسبيطار يتمرمد.. ربي يشافيه ان شاءالله..

خرجتْ من كوزينة عند خويا لكبير احمد الوسطاني نلعب معاه قتلو: شت وش كانت دايرة بنت خال بابا… وش دايرة؟…لابسة حجاب…اا يسموه جلباب هذاك هههه وش معولة ديريه؟ ايه علاه لالا ….امم مليح كي تكبري شوية ولا كي تشيبي ههههه  وراح..

حسيتها استهزاء.. علاه ميحبوش لباس الستر والعفة مفهمتش..

روحي يا ليام ورواحي، وليت 13 سنة بلغت وبديت نكبر ونجيب روحي ومناطق الانثوية بداو يبانو.. قلت لماما نلبس جلباب، رفضت رفض تام… مزالك صغيرة، وحتا تتزوجي تلبسي خمار، هااا أنا درتو كي تزوجت، على صغرك تلفي روحك كي قزانة.. بكيت ندبت، والو مقبلتش، رحت عند بابا، قتلو قالي خلي حتا تكبري شوية وديريه.. رحت غلقت على روحي وكنت مصرة نديرو ولا مكاش..